'உறியடி' விஜய்குமார் நடிக்கும் அடுத்தப் படத்தின் அறிவிப்பு வெளியாகியுள்ளது.
கடந்த 2016 ஆம் ஆண்டு 'உறியடி' படத்தின் மூலம் நடிகராகவும் இயக்குநராகவும் அறிமுகமானார் விஜய்குமார். சாதி அரசியலைப் பற்றி பேசிய 'உறியடி' வெகுவாக கவனத்தை ஈர்த்து விமர்சன ரீதியாக பாராட்டுக்களைப் பெற்றது. அதனைத்தொடர்ந்து, நடிகர் சூர்யா தயாரிப்பில் கடந்த 2018 ஆம் ஆண்டு 'உறியடி 2' படத்தை இயக்கினார்.
இந்தப் படமும் கவனத்தை ஈர்த்தது. தனது இரண்டு படங்களிலுமே சமூக அக்கறையை வெளிப்படுத்திய இயக்குநர் என்ற அங்கீகாரமும் விஜய்குமாருக்கு கிடைத்தது.
சமீபத்தில் வெளியான 'சூரரைப் போற்று' படத்தில் இவரது வசனமும் கொண்டாடப்பட்டது. விஜய்குமார் இயக்கும், நடிக்கும் படம் எப்போது வெளியாகும் என்று அப்டேட்டுக்காக, அவரது ரசிகர்கள் காத்திருந்தனர்.
இந்நிலையில், விஜய்குமாரின் அடுத்தப்பட அறிவிப்பு வெளியாகி இருக்கிறது. அவரின் இரண்டு படங்களிலும் உதவி இயக்குநராக இருந்த அப்பாஸ் இந்தப் படத்தை இயக்குகிறார். 'ரீல் குட் ஃபிலிம்ஸ்' இந்தப் படத்தை தயாரிக்கவுள்ளது. இதுகுறித்த அதிகாரப்பூர்வ அறிவிப்பை தயாரிப்பு நிறுவனமும், விஜய்குமாரும் தனது ட்விட்டர் பக்கத்தில் அறிவித்துள்ளார்கள்.
