அஜய் தேவ்கன் நடிப்பில் வெளியான ‘தன்ஹாஜி’ படம் 100 கோடி ரூபாய் வசூல் செய்துள்ளதாக தகவல் வெளியாகியுள்ளது.
அஜய் தேவ்கன் நடிப்பில் ஜனவரி 10-ஆம் தேதி வெளியான திரைப்படம் தன்ஹாஜி: தி அன்சங் வாரியர் ('Tanhaji: The Unsung Warrior') . மராத்திய அரசர் சத்ரபதி சிவாஜி மஹராஜின் படையில் ராணுவ தளபதியாக இருந்த தன்ஹாஜி மலுசாரேவின் வாழ்க்கை வரலாற்றை பின்புலமாக கொண்டு இந்தப் படம் எடுக்கப்பட்டது. கஜோல் கதாநாயகியாக நடிக்க, படத்தை தயாரித்து இருந்தார் அஜய் தேவ்கன். ஓம் ராவுத் இயக்கி இருந்தார்.
தீபிகா படுகோன் நடிப்பில் வெளியான ‘சபாக்’ படத்துடன் இந்தப் படம் வெளியானது. வெளியான நாள் முதலே தன்ஹாஜி படத்திற்கு நல்ல வரவேற்பு இருந்தது. கருத்து ரீதியாக ‘சபாக்’ படத்திற்கு நல்ல வரவேற்பு இருந்தாலும், வசூல் ரீதியாக பாக்ஸ் ஆபீஸில் தன்ஹாஜி படம் படுவேகத்தில் சென்றது.
இந்நிலையில், முதல் 3 நாட்களிலேயே 61.93 கோடி ரூபாய் வசூல் செய்திருந்த தன்ஹாஜி, 6 நாட்களில் 100 கோடி ரூபாய் வசூல் செய்து அசத்தியுள்ளது. 7 நாட்கள் நிலவரப்பட 116 கோடி ரூபாய் வசூல் ஆகியுள்ளதாக தகவல் வெளியாகியுள்ளது.
இந்த படத்திற்கு உத்தரப்பிரதேசம் மற்றும் ஹரியானா மாநிலங்களில் வரிவிலக்கு அளிக்கப்பட்டுள்ளது குறிப்பிடத்தக்கது.
