அவ்னி மூவிஸ் சார்பில் இயக்குனர் சுந்தர்.சி வழங்கும் படம், ‘மீசைய முறுக்கு’. இதை ’ஹிப்ஹாப் தமிழா’ ஆதி கதை, திரைக்கதை வசனம் எழுதி, இயக்கி, ஹீரோவாக நடித்துள்ளார். ஆத்மீகா , மனிஷா , விவேக் உட்பட பலர் நடித்துள்ளனர். யு.கே. செந்தில்குமார் ஒளிப்பதிவு செய்துள்ளார். இதன் இசை வெளியீட்டு விழா சென்னையில் நேற்று நடந்தது.
விழாவில் சுந்தர்.சி பேசும்போது, ’'கிளப்புல மப்புல' பாடல் வெளியான நேரத்தில் 'ஹிப்ஹாப்' தமிழா ஆதியை சந்தித்தேன். அவர் பணக்கார குடும்பத்தை சேர்ந்தவர் என்று நினைத்திருந்தேன். ஆனால், பழைய ஜீன்ஸ், டீ- ஷார்ட் போட்டுக்கொண்டு என்னை சந்திக்க வந்தார். 'ஆம்பள' படத்தில் ஒரு பாடலுக்கு இசையமைக்க வேண்டும் என்றேன். அந்தப் படத்தில் 5 பாடல்களுக்கு 5 இசையமைப்பாளர்களை நியமிக்கலாம் என்று இருந்தேன். ஆதி இசையமைத்த 'பழகிக்கலாம்' பாடலை கேட்டேன். நன்றாக இருந்தது. பின் ஆதி, நான்தான் அனைத்து பாடல்களுக்கும்
இசையமைப்பேன் என்றார். சரி என்றேன். அவர் சொன்னது போலவே, ஆம்பள படத்தின் அனைத்து பாடல்களும் வெற்றி பெற்றது. இப்போது, ஆதி கதாநாயகனாக, இயக்குநராக அறிமுகமாகிறார். ’மீசைய முறுக்கு’ ஆதியின் பயோ- கிராபி திரைப்படம் போல் இருக்கும். கொஞ்சம் கற்பனை கதை, நிறைய உண்மை கதை. இதுதான் மீசைய முறுக்கு. யூடியூப் ஸ்டார்ஸ் பலர் இந்த படம் மூலமாக அறிமுகமாகி உள்ளார்கள். வரும் 21-ம் தேதி வெளியாகிறது’ என்றார்.
