ஹாலிவுட் சயின்ஸ் பிக்சன் படத்தில் கன்னட நடிகர் சுதீப் முக்கிய வேடத்தில் நடிக்கிறார்.
தமிழில், ’நான் ஈ’, ’ரத்த சரித்திரம்’, ’புலி’, ’முடிஞ்ச இவனப்புடி’ படங்களில் நடித்தவர் கன்னட ஹீரோ சுதீப். இவர் இப்போது ஹாலிவுட் படத்தில் நடிக்கிறார். சயின்ஸ் பிக்சன் படமான இதில், நியூயார்க்கில் வாழும் இந்தியர் கேரக்டரில் அவர் நடிக்கிறார். அவர் தொடர்பான காட்சிகள் விரைவில் நியூயார்க்கில் தொடங்க இருக்கிறது. இந்தப் படத்தை ஆஸ்திரேலியாவை சேர்ந்த எட்டி ஆர்யா இயக்குகிறார். ஆஸ்திரேலியாவில் வசிக்கும் பெங்களூரைச் சேர்ந்த நாகேந்திரா ஜெயராம் இந்தப் படத்தின் எக்ஸ்கியூட்டிவ் தயாரிப்பாளர். சுதீப்பிடம் ஒப்பந்தம் செய்வதற்காக படக்குழு பெங்களூர் வந்துள்ளது.
எட்டி ஆர்யா கூறும்போது, ’படத்துக்கு ’ரெய்சன்’ என்று பெயர் வைத்துள்ளோம். சுதீப்பின் பர்ஸ்ட் லுக்கை ஷூட் செய்துவிட்டோம். அதை சோசியல் மீடியாவில் விரைவில் வெளியிட உள்ளோம்’ என்றார்.
நாகேந்திரா கூறும்போது, ‘சுதீப் போன்ற பெரிய ஹீரோவை இதில் நடிக்க வைத்ததில் மகிழ்ச்சி. சில மாதங்களுக்கு முன் எங்கள் ஒப்பந்தம் முடிந்திருக்க வேண்டும். ஆனால் சில படங்களில் அவர் பிசியாக இருந்ததால் முடியவில்லை. அதனால் நாங்கள் இந்தியா வந்துள்ளோம்’ என்றார்.
