900 கோடி வசூலைக் குவித்த சல்மான் கான் திரைப்படம்!

இந்திய முன்னணி பாலிவுட் ஹீரோ சல்மான் நடித்த ‘பஜ்ரங்கி பைஜான்’ திரைப்படம் சீன திரையரங்குகளில் வசூலை வாரிக் குவித்துள்ளது.

சல்மான் கான் 2 வருடங்களுக்கு முன்னர் நடித்த பாலிவுட் திரைப்படம் 'பஜ்ரங்கி பைஜான்'. இந்தப் படம் இந்தியாவில் வசூலை வாரிக்குவித்தது. அமீர்கான் நடித்த ‘தங்கல்’ மற்றும் பிரபாஸ் நடித்த ‘பாகுபலி’ உள்ளிட்ட படங்கள் சீனாவில் வெளியிடப்பட்டு அங்கும் வசூலை குவித்ததால், ‘பஜ்ரங்கி பைஜான்’ படத்தையும் சீனாவில் வெளியிட படக்குழுவினர் முடிவு செய்தனர். அவ்வாறு அண்மையில் சீனாவில் வெளியிடப்பட்ட ‘பஜ்ரங்கி பைஜான்’ அங்கு சக்கபோடு போட்டுக்கொண்டிருக்கிறது. தற்போது வரை சீனாவில் மட்டும் அப்படம் இந்திய மதிப்பில், ரூ.289.6 கோடி வசூல் செய்துள்ளது.

இதன்மூலம் இந்தியப் படங்களில் ‘தங்கல்’, ‘பாகுபலிக்கு’ பிறகு ரூ.900 கோடியை தாண்டி வசூல் செய்த படம் என்ற பெருமையை ‘பஜ்ரங்கி பைஜான்’ பெற்றுள்ளது. அத்துடன் சீனாவில் வெளியாகி வசூலை குவித்து வெளிநாட்டு படங்கள் பட்டியலில் இப்படம் 7வது இடத்தைப் பிடித்துள்ளது. மேலும் 2018ஆம் ஆண்டின் முதல் காலாண்டில் சீனாவில் அதிக வசூல் செய்த படங்கள் பட்டியலில் 15வது இடத்திற்கு முன்னேறியுள்ளது.