'இந்தியாவின் பிரபல தொழிலதிபர் ரத்தன் டாடாவின் வாழ்க்கை வரலாற்றுப் படத்தில் நடிக்கப் போகிறீர்களா?' என்று ரசிகை ஒருவர் கேட்ட சந்தேகத்திற்கு 'இல்லை' என்றுகூறி நடிகர் மாதவன் அதற்கான விளக்கம் அளித்துள்ளார்.
இந்தியாவில் சமூகத்திற்காக பங்காற்றிய அரசியல் தலைவர்கள், பரபரப்பை ஏற்படுத்திய பிரபலமான நபர்கள், விளையாட்டுத் துறையினர், சினிமா பிரபலங்கள் என பலரின் வாழ்க்கை வரலாற்று படங்கள் எடுக்கப்படுவது இப்போது அதிகரித்து வருகிறது.
காந்தி, அம்பேத்கர், காமராஜர், தோனி, மேரி கோம், ஜெயலலிதா என பிரபலங்களில் பட்டியல் நீள்கிறது. அப்படித்தான், பிரபல தொழிலதிபர் ரத்தன் டாடாவின் வாழ்க்கை வரலாற்றுப் படத்தில் நடிகர் மாதவன் நடிக்கவிருக்கிறார் என்ற தகவல் பரவி வருகிறது. தொழிலதிபராக இருந்தாலும் டாடா குழுமம் சமூகத்திற்காகவும் சமூக சிந்தனையோடு அறத்துடன் செய்தவை ஏராளம் என்பது பரவலான மக்களின் பார்வை.
கொரோனா ஊரடங்கின்போது டாடா குழுமம் பிரதமர் நிவாரண நிதிக்கு 500 கோடி ரூபாய் நிதியுதவி அளித்தபோது "இது உற்ற நேரத்தில் செய்யப்பட்ட உதவி. இதுவே டாடாவின் பெருமை" என்றுக்கூறி டாடா குழுமத்தின் தலைவர் ரத்தன் டாடாவை பாராட்டி இருந்தார், நடிகர் மாதவன்.
அதிலிருந்தே ரத்தன் டாடாவின் வாழ்க்கை வரலாற்றுப் படத்தை சுதா கொங்கரா இயக்க, மாதவன் நடிக்கப் போகிறார் என்ற தகவல்கள் பரவி வந்தன.
இந்நிலையில், இன்று ரசிகை ஒருவர் "ரத்தன் டாடா வாழ்க்கை வரலாற்று படத்தில் நீங்கள் நடிக்கப்போகிறீர்கள் என்பது உண்மையா? இது நடந்தால் பலருக்கும் பெரிய உத்வேகத்தை அளிக்கும்" என்று உற்சாகத்துடன் கேள்வி எழுப்பியிருந்தார்.
அதற்கு ரிப்ளையில் பதிலளித்த மாதவன் “துரதிஷ்டவமாக இந்த செய்தியில் உண்மை இல்லை. இது ரசிகர்கள் உருவாக்கிய புகைப்படங்கள். அவர்களின் விருப்பம். இதுவரை ரத்தன் டாடா வாழ்க்கை வரலாற்றுப் படம் குறித்த எந்தத் திட்டமிடலும் இதுவரை இல்லை. அதுகுறித்து, விவாதிக்கப்படவும் இல்லை” என்று மறுப்பு தெரிவித்துள்ளார்.
