‘புஷ்பா’ திரைப்படம் திரையரங்குகளில் வெளியாகி 50 நாட்களை கடந்துள்ளநிலையில், உலகம் முழுவதும் ரூ. 365 கோடி வசூல் செய்துள்ளதாக படக்குழு அறிவித்துள்ளது.
அல்லு அர்ஜூன் நடிப்பில், சுகுமார் இயக்கத்தில் பிரம்மாண்டமாக உருவாகியிருந்த திரைப்படம் ‘புஷ்பா: தி ரைஸ் பார்ட் 1’. இந்தப் படத்தில் அல்லு அர்ஜூன் ஜோடியாக ராஷ்மிகா மந்தனா நடித்திருந்தார். செம்மரக் கடத்தலை மையமாக வைத்து உருவாகியிருந்த இந்தப் படத்தில் பகத் பாசில் முக்கிய கதாபாத்திரத்தில் நடித்துள்ளார். தேவி ஸ்ரீ பிரசாத் இசையில் முன்னணி நடிகையான சமந்தா, ஒரு பாடலுக்கு நடனமாடியிருந்தார்.
உலகம் முழுவதும் வெளியான இந்தப் படத்திற்கு ரசிகர்களிடம் இருந்து நல்ல வரவேற்பு கிடைத்து வருகிறது. இந்தப் படத்தின் பாடல்கள், ஆக்ஷன் காட்சிகள் என அனைத்தும் இன்று வரை பட்டையை கிளப்பி வருகிறது. கிரிக்கெட் வீரர்கள் முதல் சினிமா பிரபலங்கள் வரை பலரும், அல்லு அர்ஜூனின் வித்தியாசமான கதாபாத்திரத்தை இமிடேட் செய்து சமூகவலைத்தளங்களில் வெளியிட்டு வருகின்றனர்.
கொரோனா ஊரடங்கு கட்டுப்பாடுகளிலும் திரையரங்குகளில் வெளியாகி 50 நாட்களை கடந்துள்ளது. எனினும், இன்னும் பல திரையரங்குகளில் ‘புஷ்பா’ திரைப்படம் வெற்றிகரமாக ஓடிக்கொண்டிருக்கிறது. இந்நிலையில், இந்தப் படம் உலகளவில் ரூ.365 கோடி வசூல் செய்துள்ளதாக படக்குழு அறிவித்துள்ளது. நீண்ட நாட்களுக்குப் பிறகு ஒரு இந்தியப் படம், இந்த அளவிலான வசூல் பார்த்துள்ளது திரைத்துறையினருக்கு மகிழ்ச்சியளித்துள்ளது. இதனால், புஷ்பா திரைப்படம் கடந்த ஆண்டு வெளியான திரைப்படங்களிலே அதிகம் வசூல் செய்த திரைப்படமாக மாறியுள்ளது. #50DaysForBlockbusterPushpa என்ற ஹேஷ்டெக்கும் ட்விட்டரில் ட்ரெண்ட் ஆகிறது.
