நரகாசூரன் திரைப்படம் சினிமாவை ஒரு படி மேலே கொண்டு செல்லும் அடுத்தகட்டம் என இயக்குநர் கெளதம் மேனன் தெரிவித்துள்ளார்.
துருவங்கள் பதினாறு திரைப்படத்தை தொடர்ந்து, நரகாசூரன் என்ற திரைப்படத்தை கார்த்திக் நரேன் இயக்கிவருகிறார். இயக்குநர் கௌதம் மேனன் தயாரிக்கும் இந்த படமானது தமிழ், தெலுங்கு என இரண்டு மொழிகளில் எடுக்கப்பட்டு வருகிறது. இதில் அரவிந்த்சாமி, மாநகரம் சந்தீப், மலையாள நடிகர் இந்திரஜித், ஸ்ரேயா உள்ளிட்டோர் நடித்து வருகின்றனர். ‘துருவங்கள் பதினாறு’ திரைப்படத்தைப் போன்று, நரகாசூரனும் த்ரில்லர் படமாக உருவாகி வருதாகக் கூறப்படுகிறது. இந்த படத்தின் ஃபர்ஸ்ட் லுக் அண்மையில் வெளியிடப்பட்டதைத் தொடர்ந்து, இன்று முதல் படப்பிடிப்பு தொடங்கியுள்ளது.
இதுகுறித்து ட்விட்டரில் பதிவிட்டுள்ள கெளதம் மேனன், நரகாசூரன் படம் சினிமாவை அடுத்தகட்டத்திற்குக் கொண்டு செல்லும் என்று கூறியுள்ளார். அத்துடன், தங்களுடன் இணைந்து படபிடிப்பை தொடங்கும் நடிகர்களுக்கும், படக்குழுவினருக்கும் வாழ்த்துகளை அவர் தெரிவித்துள்ளார்.
