‘தளபதி62’ படத்தில் விஜய்யுடன் நடித்துள்ளதை குறித்து தனது மகிழ்ச்சியை பகிர்ந்து கொண்டுள்ளார் நடிகர் பிரேம்.
‘விக்ரம் வேதா’ படத்தின் மூலம் தனது அடுத்த அடியை தொடங்கியவர் நடிகர் பிரேம். அவரது நடிப்பு அந்தப் படத்தில் பரவலாக கவனம் பெற்றது. இவர் இப்போது ‘செயலி’, ‘எழுமின்’ போன்ற படங்களில் நடித்து முடித்துள்ளார். ‘செயலி’ முழுக்க முழுக்க ஃபேமலி எண்டர்டெய்ண்ட்மெண்ட் திரைப்படம். ‘எழுமின்’ குழந்தைகளை மையமாக வைத்து உருவாகியுள்ள திரைப்படம். இதை எல்லாம் விட பிரேம் இந்த வருஷம் அதிக மகிழ்ச்சியில் மிதக்கிறார். காரணம், அவர் விஜய்யின் ‘தளபதி62’ படத்தில் நடித்துள்ளார். அது குறித்து அவர் மனம் திறந்துள்ளார்.
அதில், “நான் இந்தப் படத்தில் மிக முக்கியமான கதாப்பாத்திரத்தில் நடித்திருக்கிறேன். என் பாத்திரம் முழுமையான பாத்திரமாக இருக்கும். நான் ஏற்கெனவே எனது சில நாள் ஷூட்டிங்கை முடித்துவிட்டேன். மேலும் இந்த மாத இறுதியில் நடக்க உள்ள படப்பிடிப்பில் பங்கேற்க இருக்கிறேன். இந்தப் படத்தில் என்னுடைய பெரும்பாலான காட்சிகள் விஜய் கூடவே இருக்கும். நான் அவர் கூடவே பயணிக்கும் ஒரு பாத்திரத்தில் நடித்துள்ளேன். பெரிய மகிழ்ச்சியாக இருக்கிறது” எனக் கூறியுள்ளார் பிரேம்.
‘தளபதி62’ படத்தை ஏ.ஆர்.முருகதாஸ் இயக்கி வருகிறார். இந்தப் படத்திற்கு இன்னும் முறையாக தலைப்பிடவில்லை. படத்திற்கு ஏ.ஆர். ரஹ்மான் இசையமைக்கிறார். மிக பிரமாண்ட அளவில் இப்படம் தயாராகி வருகிறது.
