கமல்ஹாசன் போன்ற நேர்மறையான எண்ணம் கொண்டவர்கள் அரசியலுக்கு வருவது நல்லது என நடிகர் எஸ்.வி சேகர் தெரிவித்துள்ளார்.
நடிகர் கமல்ஹாசன் சமீப காலமாக அரசியல் விமர்சனங்களையும், சமூக கருத்துகளையும் அதிகமாக தெரிவித்து வருகின்றார். கடந்த சில வாரங்களுக்கு முன், தமிழக அரசில் ஊழல் அதிகரித்துள்ளதாக கமல் குற்றம்சாட்டினார். இதையடுத்து அமைச்சர்களுக்கும், கமலுக்கும் இடையே கருத்து மோதல் ஏற்பட்டது. இதன்பிறகு கமல், தமிழக அரசை அதிகமாக விமர்சித்து வருகிறார். மேலும் அண்மையில் திருமண விழா ஒன்றில் பேசிய அவர், தான் அரசியலுக்கு வந்து விட்டதாகவும் தெரிவித்திருந்தார்.
இந்நிலையில் கமல்ஹாசனை ஆழ்வார்பேட்டையில் உள்ள அவரது இல்லத்தில் நடிகர் எஸ்.வி.சேகர் இன்று சந்தித்தார். பின்னர் செய்தியாளரிடம் பேசிய அவர், முறையாக வருமான வரி கட்டும் கமல் அரசியலுக்கு வர வேண்டும் என்றும், அவரை போன்ற நேர்மறையான எண்ணம் கொண்டவர்கள் அரசியலுக்கு வருவது நல்லது என்றும் தெரிவித்தார்.
