மாரி படத்தின் இரண்டாம் பாகத்திற்கான பணிகள் தொடங்கியுள்ளது என்று தனது ட்விட்டர் பக்கத்தில் அறிவித்துள்ளார் இயக்குநர் பாலாஜிமோகன்.
இயக்குநர் பாலாஜிமோகன் - நடிகர் தனுஷ் கூட்டணியில் உருவான திரைப்படம் மாரி. 2015 ஆம் ஆண்டு வெளிவந்த இந்தப்படம் கலவையான விமர்சனங்களை பெற்றாலும் தனுஷ் ரசிகர்களிடையே நல்ல வரவேற்பை பெற்று வெற்றியடைந்தது. மாரி படத்தின் இரண்டாம் பாகம் குறித்த தகவல்கள் அவ்வப்போது கசிந்து வந்தாலும் அதிகாரப்பூர்வ அறிவிப்பு எப்போது வரும் என்ற எதிர்பார்ப்பு தனுஷ் ரசிகர்கள் மத்தியில் இருந்தது. இதனையடுத்து தற்போது, மாரி-2 படத்தின் வேலைகள் தொடங்கவுள்ளதாக இயக்குநர் பாலாஜிமோகன் தனது அதிகாரப்பூர்வ டிவிட்டர் பக்கத்தில் தெரிவித்துள்ளார். படத்திற்கு பூஜை போடப்பட்டுள்ள புகைப்படத்தையும் தன் ட்விட்டர் பக்கத்தில் அவர் வெளியிட்டுள்ளார். மாரி படத்தில் அனிருத் இசையமைத்திருந்தார். படத்தின் பாடல்கள், பின்னணி இசை ஆகியவை பெரும் வரவேற்பை பெற்றிருந்த நிலையில் அதன் இரண்டாம் பாகத்திலும் அனிருத்தே இசையமைப்பாரா என்ற எதிர்பார்ப்பு ரசிகர்கள் மத்தியில் எழுந்துள்ளது.
நடிகர், நடிகைகள் தேர்வு குறித்த விவரம், முதல் பாகத்தில் நடித்த காஜல் அகர்வால், ரோபோ ஷங்கர் உள்ளிட்டோர் இரண்டாம் பாகத்தில் நடிப்பார்களா என்பது குறித்து இன்னும் எந்த தகவலும் வெளியாகவில்லை.
