ஜிஎஸ்டி வரிவிதிப்பால் தமிழ்த் திரையுலகம் கடும் விளைவை சந்திக்கும் என்று கூறப்பட்டு வந்த நிலையில் அதையும் தாண்டி ரசிகர்கள் தியேட்டருக்கு படையெடுத்து வந்திருப்பது தமிழ்த் திரையுலகை மகிழ்ச்சியடைய வைத்துள்ளது.
கடந்த வெள்ளிக்கிழமை வெளியான, ’விக்ரம் வேதா’, ’மீசைய முறுக்கு’ படங்களுக்கு தமிழகம் முழுவதும் நல்ல ஓபனிங் கிடைத்திருக்கிறது. இதே போல ஆங்கில படமான, கிறிஸ்டோபர் நோலனின், ’டுன்கிர்க்’, சாய் பல்லவி நடித்துள்ள தெலுங்கு படமான, ‘பிடா’ ஆகிய திரைப்படங்களும் நல்ல ஓபனிங்கை பெற்றுள்ளன.
ஜிஎஸ்டி வரி விதிப்பு காரணமாக டிக்கெட் விலை அதிகரித்துள்ளதால், ரசிகர்கள் தியேட்டருக்கு வருவது குறையும் என்ற நிலை இருந்தது. கடந்த இரண்டு வாரங்களுக்கு முன் வெளியான படங்கள் அந்தப் பாதிப்பில் இருந்தன. ஆனால், விக்ரம்வேதா, மீசைய முறுக்கு படங்கள் நல்ல வசூலை பெற்றிருப்பது திரைத்துறையினர் மத்தியில் மகிழ்ச்சியை ஏற்படுத்தியுள்ளது.
‘நல்ல கதையை கொண்ட படங்களாக இருந்தால் ரசிகர்கள் தியேட்டருக்கு தேடி வருவார்கள் என்பதை இந்தப் படங்கள் நிரூபித்திருக்கின்றன’ என்கிறார்கள் சினிமா துறையினர்.
‘கடந்த மூன்று நாட்களாக, இந்தப் படங்கள் சிறப்பான வரவேற்பை பெற்றிருக்கின்றன. வரும் வாரம் வரை ஹவுஸ்புல்லாக புக்கிங் நடந்துள்ளது’ என்கிறார் ஈசிஆர் தியேட்டர் ஒன்றின் மேலாளர்.
