மலையாளத்தில் மோகன் லால் நடிப்பில் நேற்று அமேசான் பிரைமில் வெளியான "திருஷ்யம் 2" தெலுங்கு மொழியில் ரீமேக் செய்ய இருப்பதாக அதிகாரப்பூர்வமாக அறிவிக்கப்பட்டுள்ளது. தெலுங்கில் முதல் பாகத்தில் நடித்த நடிகர் வெங்கடேஷே கதாநாயகனாக நடிக்க இருப்பதாகவும் தெரிவிக்கப்பட்டுள்ளது.
ஜீது ஜோசப் இயக்கத்தில் மோகன்லால் நடிப்பில் 2013 ஆம் ஆண்டு வெளியானது "திருஷ்யம்". ஒரு குடும்பம் சந்தர்ப்ப சூழ்நிலையால் தற்காப்புக்காக கொலை செய்துவிட்டு அதனை காவல்துறையிடமிருந்து சிக்காமல் தப்பிப்பதே "திருஷ்யம்" படத்தின் முக்கியமான கதையம்சம். சினிமாவின் 'கிரைம் த்ரில்லர்' கதையாக்கத்தில் உருவான இத்திரைப்படம் 2013 இல் மலையாள திரையுலகில் பெரும் வரவேற்பை பெற்றது. அதன்பின்பு இத்திரைப்படம் தமிழ், இந்தி, கன்னடம் மற்றும் தெலுங்கில் ரீமேக் செய்யப்பட்டு வெற்றிப்பெற்றது.
அதன்பின்பு 8 ஆண்டுகள் கழித்து மீண்டும் "திருஷ்யம் 2" அதே ஜீது ஜோசப் கை வண்ணத்தில் வெளியாகி இப்போது நல்ல விமர்சனங்களை பெற்று வருகிறது. மலையாளத்தில் வெளியான சிறந்த கிரைம் த்ரில்லர் திரைப்படம் இது என பலரும் கொண்டாடி வருகின்றனர். பொதுவாக முதல் பாகத்தின் தொடர்ச்சியாக எடுக்கப்படும் படங்கள் வெற்றிப்பெறுவது அரிது. ஆனால் மிகச்சிறந்த திரைக்கதை மூலமும் நேர்த்தியான இயக்கத்தின் மூலமாக திருஷ்யம் 2 வின் பெரு வெற்றியை சாத்தியமாக்கி இருக்கிறார் இயக்குநர் ஜீது ஜோசப்.
இந்நிலையில் திருஷ்யம் 2 தெலுங்கு மொழியில் ரீமேக் செய்யப்பட இருக்கிறது. திருஷ்யம் முதல் பாகமும் தெலுங்கில் எடுக்கப்பட்டது. அதில் கதாநாயகனாக நடிகர் வெங்கடேஷ் நடித்திருந்தார். அதுவும் தெலுங்கில் பெரும் வெற்றியைப் பெற்றது. இப்போது திருஷ்யம் 2விலும் வெங்கடேஷ் நடிக்கிறார். இத்திரைப்படத்தை ஜீது ஜோசப்பே தெலுங்கிலும் இயக்கவிருக்கிறார். இதன் படப்பிடிப்பு மார்ச் மாதம் தொடங்க இருப்பதாக அதிகாரப்பூர்வமாக அறிவித்துள்ளனர்.
