சிவகார்த்திகேயன் நடிப்பில் திரையரங்குகளில் வெளியாகியுள்ள ‘டான்’ திரைப்படத்தின் ஓடிடி வெளியீடு குறித்த தகவல் வெளியாகியுள்ளது.
அறிமுக இயக்குநர் சிபி சக்ரவர்த்தி இயக்கத்தில், சிவகார்த்திகேயன் நடித்து கடந்த 13-ம் தேதி திரையரங்குகளில் வெளியானப் படம் ‘டான்’. சிவகார்த்திகேயனின் எஸ்கே புரொடெக்ஷன்ஸ் மற்றும் லைக்கா புரொடெக்ஷன்ஸ் தயாரித்துள்ள இந்தப் படத்தில், பிரியங்கா அருள் மோகன், எஸ்.ஜே.சூர்யா, சமுத்திரகனி, சூரி, பாலசரவணன், முனீஸ்காந்த், ஆர்.ஜே.விஜய் ஆகியோர் நடித்திருந்தனர்.
பள்ளி, கல்லூரி கதைக்களத்தில் உருவாக்கப்பட்ட இந்தப் படம் ரசிகர்களிடையே விமர்சனரீதியாக வரவேற்பு பெற்றுள்ளது. இந்நிலையில், இந்தப் படத்தின் ஓடிடி வெளியீடு குறித்த தகவல் வெளியாகியுள்ளது. திரையரங்குகளில் வெளியாகி 4 வாரங்களுக்குப் பிறகு, ஓடிடி பிளாட்பார்மில் வெளியிடும் வகையில், ‘டான்’ திரைப்படம் வருகிற ஜுன் 10-ம் தேதி நெட்ஃபிளிக்ஸில் வெளியாகலாம் என்று தகவல்கள் வெளியாகியுள்ளது.
தற்போது சிவகார்த்திகேயன், பிரபல தெலுங்கு இயக்குநன அனூதீப் இயக்கத்தில் தமிழ், தெலுங்கில் உருவாகிவரும் ‘எஸ்.கே.20’ என்று தற்காலிகமாக பெயரிடப்பட்டுள்ள படத்தில் நடித்து வருகிறார். இந்தப் படத்தில் மரியா, சத்யராஜ், நவீன் பாலிஷெட்டி மற்றும் பிரேம்ஜி அமரன் ஆகியோர் நடிக்கின்றனர். மேலும், கமல்ஹாசன் தயாரிப்பில், ராஜ்குமார் பெரியசாமி இயக்கத்தில் ‘எஸ்.கே.21’ என்ற படத்தில் சிவகார்த்திகேயன் நடிக்கின்றார். இந்தப் படத்தில் அவருக்கு ஜோடியாக சாய் பல்லவி நடிக்கிறார்.
