தனுஷின் ’மாரி2’ படத்திற்காக இளையராஜா ஒரு பாடலைப் பாடி தந்துள்ளார்.
பாலாஜி மோகன் இயக்கத்தில் வெளிவந்த திரைபடம் மாரி. அதன் வெற்றியைத் தொடந்து அதன் இரண்டாம் பாகம் உருவாகி வருகிறது. அப்படத்திற்கு ‘மாரி2’ என தலைப்பிட்டுள்ளனர். இதற்கு யுவன் சங்கர் ராஜா இசையமைத்து வருகிறார். அவர் இசையமைப்பதாக செய்தி வெளியான போது சமூக வலைதளத்தில் அந்தச் செய்தி பரபரப்பாக பகிரப்பட்டது. இதில் தனுஷுக்கு ஜோடியாக சாய் பல்லவி நடித்து வருகிறார். முதன்முறையாக அவர் தனுஷுக்கு ஜோடியாக நடிக்கிறார்.
இந்நிலையில் தனுஷ் தனது ட்விட்டர் பக்கத்தில் ஒரு செய்தியை பகிர்ந்து கொண்டிருக்கிறார். யுவன் இசையில் இசைஞானி இளையராஜா ஒரு பாடலை பாடி உள்ளதாகக் குறிப்பிட்டுள்ள அவர்: “மிகமிக சந்தோஷமாக இருக்கிறது. இசைஞானி இளையராஜா மாரி2வில் ஒரு பாடலை பாடித் தந்துள்ளார். அவரது பாடல் அனுபவம் தெய்வீகமாக இருந்தது. நாங்கள் ஆசிர்வதிக்கப்பட்டவர்களாக உணர்கிறோம்.” என்று கூறியுள்ளார். கூடவே இளையராஜாவுடனான அவரது படங்களையும் வெளியிட்டுள்ளார்.
