ரஜினிகாந்த் நடிப்பில் உருவாகியுள்ள ‘தர்பார்’ திரைப்படம் பொங்கலை முன்னிட்டு ஜனவரி 9ஆம் தேதி வெளியாகிறது என அறிவிக்கப்பட்டுள்ளது.
ரஜினிகாந்த் நடித்து வரும் ‘தலைவர் 168’ படத்தின் படப்பிடிப்பு ஹைதராபாத் ராமோஜி ராவ் ஃபிலிம் சிட்டியில் நடைபெற்று வருகிறது. அதில் நடிகர் ரஜினிகாந்த் கலந்து கொண்டுள்ளார். இப்படத்தில் 25 ஆண்டுகளுக்குப் பிறகு நடிகை மீனா, குஷ்பு ஆகிய இரு நடிகைகளும் ரஜினிகாந்துடன் இணைந்து நடித்துள்ளனர்.
மேலும் நடிகை கீர்த்தி சுரேஷ், முதன்முறையாக ரஜினியுடன் சேர்ந்து நடிக்கிறார். குஷ்பு, இதில் வில்லி கதாபாத்திரத்தில் நடிக்க இருப்பதாக தெரிகிறது. ஆனால் இது குறித்து அதிகாரப்பூர்வமான செய்திகள் ஏதும் வெளியாகவில்லை. இந்நிலையில் ஏ.ஆர்.முருகதாஸ் இயக்கத்தில் ‘தர்பார்’ திரைப்படம் பொங்கல் பண்டிகையை முன்னிட்டு ஜனவரி 9ஆம் தேதி வெளியாகும் என அதிகாரப்பூர்வமாக அறிவிக்கப்பட்டுள்ளது. இதுதொடர்பான தகவலை தயாரிப்பு நிறுவனமான லைகா ட்விட்டரில் வெளியிட்டிருக்கிறது.
