பிரபல சின்னத்திரை நடிகை சித்ராவின் மரணம் சின்னத்திரை உலகில் பெரும் அதிர்ச்சியை ஏற்படுத்தியிருக்கும் நிலையில், 'பாண்டியன் ஸ்டோர்' சீரியலில் சித்ராவுக்கு ஜோடியாக நடித்த நடிகர் குமரன் தனது இன்ஸ்டாகிராம் பக்கத்தில் உருக்கத்துடன் பதிவிட்டுள்ளார்.
தொகுப்பாளினி, டான்ஸர் என சின்னத்திரை நடிகை சித்ராவுக்கு பல முகங்கள் இருந்தாலும் அவரை மிகவும் பிரபலமாக்கி ரசிகர்களை குவித்தது என்றால், அது ’பாண்டியன் ஸ்டோர்’ சீரியல்தான்.
கதிர்-முல்லை ஜோடிக்கு தனி ரசிகர் கூட்டமே உண்டு. சீரியலில் எதிர்பாராத விதமாக விருப்பமில்லாமல் திருமணம் செய்துகொள்ளும் முல்லைக்கும் கதிருக்கும் இடையே மலரும் காதல் அழகாக காட்சியமைக்கப்பட்டிருந்தது.
இந்தக் காதலுக்காகவே பாண்டியன் ஸ்டோர்ஸ் புரோமோவை விஜய் டிவியினர் எப்போது வெளியிடுவார்கள் என்று வெவ்வேறு புரொமோக்களில் ரசிகர்கள் கமெண்ட் செய்வார்கள். அப்படியும் வெளியாகும் பாண்டியன் ஸ்டோர் புரோமோவில் முல்லை, கதிரைக் காட்டாவிட்டால் கண்டனமே தெரிவிக்கும் ரசிகர்களும் இருக்கிறார்கள்.
இவை எல்லாவற்றையும்விட இந்த சீரியலின் முதன்மை ஹீரோயினாக நடிகை சுஜிதா நடித்து வந்தார். இவரே ஒரு கட்டத்தில் முல்லையாக நடித்த சித்ராவுக்குத்தான் சீரியலில் அதிக முக்கியத்துவம் கொடுக்கப்படுகிறது என்றுக் கூறியது சமீபத்தில் சர்ச்சையும் ஆனது.
அந்தளவிற்கு, பாண்டியன் ஸ்டோர் சீரியலில் முல்லை என்ற கேரக்டரில் அனைவரையும் ஈர்த்திருந்தார் சித்ரா. பாண்டியன் ஸ்டோர்ஸ் சகோதரர்களின் கூட்டுக்குடும்பத்தில் திருமணம் செய்துகொள்ளும் சித்ரா, குடும்பம் பிரிந்துவிடாமல் அனைவரிடமும் விட்டுக்கொடுத்து செல்லும் கிராமத்துப் பெண் கேரக்டர் என்பதால், இவருக்கு சமூக வலைதளங்களில் பேன்ஸ் பேஜ்களே ஏராளமாக நிறைந்திருக்கின்றன.
இந்நிலையில், சித்ராவின் மரணம் தொடர்பாக அவருடன் கதிராக நடித்த நடிகர் குமரன் தனது இன்ஸ்டாகிராம் ஸ்டோரியில் சித்ராவின் புகைப்படத்தை பகிர்ந்து ”உன்னுடைய தைரியத்தால்தான் நீ அறியப்பட்டாய். பல பெண்களுக்கு முன்னுதாரணமாக இருந்தாய். நீ எதிர்த்து போராடி இருக்கவேண்டும் என்று நான் ஆசைப்படுகிறேன். ஆனால், இது பதிலல்ல” என்று உருக்கமுடன் பதிவிட்டுள்ளார்.
