கார்த்தி நடித்திருக்கும் ‘கைதி’ திரைப்படத்தின் இரண்டாவது டிரைலர் வெளியாகியுள்ளது.
‘மாநகரம்’ படத்தின் இயக்குநர் லோகேஷ் கனகராஜ் இயக்கத்தில் கார்த்தி நடித்திருக்கும் திரைப்படம் ‘கைதி’. இந்தப் படத்தில் நரேன், பொன்வண்ணன், யோகி பாபு உள்ளிட்டோர் நடித்துள்ளனர். படத்தின் ஃபர்ஸ்லுக் மற்றும் டீஸர் ஏற்கனவே ரிலீஸாகி ரசிகர்கள் மத்தியில் வரவேற்பை பெற்றிருந்தது.
இந்நிலையில் படத்தின் டிரைலர் இன்று வெளியிடப்பட்டிருக்கிறது. படத்தில் சண்டைக் காட்சிகளுக்கு பஞ்சமிருக்காது என்பதும், மகள் பாசம் பேசும் படமாக இருக்கும் என்பது டிரைலரில் தெரிகிறது. படம் முழுவதும் இரவில் நடக்கும் சினிமா என்பதால், மாநகரத்தின் சாயல் இருக்கும் என்பதும் புரிகிறது.
டிரைலரின் இறுதியில் “சாவுரதா இருந்தாலும் சண்ட போட்டு சாவனும்”எனும் வசனத்தை கார்த்திக் கூறுகிறார். தீபாவளியன்று படம் வெளியாகும் நிலையில், அதேநாளில் விஜயின் ‘பிகில்’, விஜய் சேதுபதியின் ‘சங்கத்தமிழன்’ ஆகிய படங்கள் வெளியாவது குறிப்பிடத்தக்கது.
