ஆஸ்கர் விருது வழங்கும் விழா, அமெரிக்காவின் லாஸ் ஏஞ்சல்ஸ் நகரில் உள்ள டால்பி தியேட்டரில் நாளை காலை நடக்கிறது.
ஹாலிவுட் சினிமாவின் உயர்ந்த விருதாகக் கருதப்படுவது ஆஸ்கர். ஒவ்வொரு வருடமும் இந்த விருது விழாவை உலகம் முழுவதும் உள்ள சினிமா கலைஞர்கள் ஆவலுடன் எதிர்பார்த்திருப்பார்கள். 91-வது ஆஸ்கர் விருது விழா, வரும் 24 ஆம் தேதி அமெரிக்காவின் லாஸ் ஏஞ்சல்ஸ் நகரில் உள்ள டால்பி தியேட்டரில் நாளை காலை நடைபெறுகிறது.
இந்த நிகழ்ச்சியை தொகுத்து வழங்குவதாக இருந்த நடிகர் கெவின் ஹார்ட் விலகியதை அடுத்து, வேறு யாரும் தொகுத்து வழங்கவில்லை. இதனால் தொகுப்பாளர் இல்லாமலேயே இந்த விழா நடக்கிறது.
91-வது ஆஸ்கர் விருதுக்கு, தி ஃபேவரைட் மற்றும் 'ரோமா' படங்கள் அதிக பிரிவுகளில் பரிந்துரை செய்யப்பட்டுள்ளன. தலா 10 பிரிவுகளில் இரண்டு படங்களும் பரிந்துரை செய்யப்பட்டுள்ளன.
(ரோமா படத்தில்...)
மாதவிடாய் குறித்த மூட நம்பிக்கைகளை இந்திய பெண்கள் எப்படி எதிர்த்து போராடுகிறார்கள் என்பதை பற்றிய ’Period. End of Sentence’ என்ற படம் ஆவணப்படப்பிரிவில் ஆஸ்கருக்குப் பரிந்துரைக்கப்பட்டுள்ளது. மேலும் நிஜமான பேட்மேனான கோவையை சேர்ந்த அருணாச்சலம் முருகானந்தத்தின் சிறப்பான பணியை பற்றி பேசும் படம் இது என்பது குறிப்பிடத்தக்கது.
இந்த விழாவை, ஹாட் ஸ்டாரில் நேரடியாகப் பார்க்க முடியும். அதோடு ட்விட்டரிலும் இந்த விழா நேரடியாக ஒளிபரப்பப்படுகிறது.
