அடிப்பட்ட தெரு நாய்க்கு மருந்தாளர் ஒருவர் சிகிச்சை அளிக்கும் வீடியோ சமூக வலைத்தளத்தில் அனைவரின் பாராட்டை பெற்று வருகிறது.
துருக்கி நாட்டின் இஸ்தான்புல் நகரின் தெரு ஒன்றில் சுற்றித் திரிந்த நாய்க்கு காலில் காயம் ஏற்பட்டுள்ளது. இதனையடுத்து அந்த நாய் ஒரு மருந்துகடையின் வாசலில் சென்று நின்றுள்ளது. இதனைத் தொடர்ந்து அந்த மருந்து கடையிலிருந்து மருந்தாளுநர் அந்த நாய்க்கு சிகிச்சை அளிக்கிறார். இது தொடர்பான வீடியோ சமூக வலைத்தளத்தில் பதிவிடப்பட்டுள்ளது. இந்த வீடியோ நெட்டிசன்களின் பாராட்டை பெற்றுள்ளது.
இந்த வீடியோவில், காயமடைந்த நாய் தன் காலினை மருந்தாளுனரின் கையில் வைத்து சிகிச்சை பெறுவது போல் காட்சிகள் அமைந்துள்ளன. அதற்குப் பின் சிகிச்சை முடிந்தவுடன் அந்த நாய் மருந்தாளுநருக்கு நன்றி தெரிவிக்கும் விதமாக தரையில் படுத்துகொள்வது போல் கட்சிகள் இடம்பெற்றுள்ளது.
இது தொடர்பாக சிகிச்சை அளித்த மருந்தாளுநர் பானு சென்கிஸ், “நான் இந்த நாய்க்கு சிகிச்சை அளித்தேன். அதற்குப் பின் எனக்கு நன்றி தெரிவிக்கும் விதமாக இந்த நாய் செய்தது என்னை மனம் நெகிழவைத்தது” எனத் தெரிவித்தார்.