அஸ்ட்ராஜெனகா கொரோனா தடுப்பூசி செலுத்தப்பட்டபின் ரத்த உறைவு பிரச்னையால் பாதிக்கப்பட்ட 30 பேரில் 7 பேர் உயிரிழந்ததாக, இங்கிலாந்தின் மருந்துவ ஒழுங்குமுறை ஆணையம் தெரிவித்திருக்கிறது.
ஆக்ஸ்போர்டு-அஸ்ட்ராஜெனகா தடுப்பூசி செலுத்தப்பட்ட பின்னர், மார்ச் 24-ஆம் தேதி வரை ரத்த உறைவால் 30 பேர் பாதிக்கப்பட்டனர். இவர்களுக்கு தீவிர சிகிச்சை அளிக்கப்பட்டு வந்த நிலையில், பாதிக்கப்பட்ட ஏழு பேர் உயிரிழந்ததாக இங்கிலாந்து மருத்துவ ஒழுங்குமுறை ஆணையம் தெரிவித்திருக்கிறது.
பல ஐரோப்பிய நாடுகள் அஸ்ட்ராஜெனகா தடுப்பூசி பக்கவிளைவுகளை உருவாக்குவதாக தடைவிதித்திருக்கும் சூழலில், இங்கிலாந்திலும் இந்தத் தடுப்பூசி காரணமாக இறப்புகள் பதிவாகியிருக்கிறது.
அஸ்ட்ராஜெனகா தடுப்பூசி பாதுகாப்பானது என்று முன்பு அறிவித்த ஐரோப்பிய மருந்துகள் ஆணையம், ஏப்ரல் 7 ஆம் தேதி இந்த விவகாரம் குறித்து புதிய அறிவிப்பை வெளியிடும் என்று எதிர்பார்க்கப்படுகிறது. அஸ்ட்ராஜெனகா தடுப்பூசி பாதுகாப்பானது, ஆனால் வயது, பாலினம் மற்றும் இணைநோய்கள் போன்ற குறிப்பிட்ட ஆபத்து காரணிகளை பற்றி வல்லுநர்கள் கண்டுபிடிக்கவில்லை என்றும் ஐரோப்பிய மருந்துகள் ஆணையம் கூறியுள்ளது.
இலங்கிலாந்தில் 18.1 மில்லியன் டோஸ் தடுப்பூசிகள் செலுத்தப்பட்ட பின்னர், இந்த 30 பேர் ரத்த உறைவால் பாதிக்கப்பட்டிருப்பதாக வந்ததாக இங்கிலாந்து மருந்து கட்டுப்பாட்டு ஆணையம் தெரிவித்தது. ஆனால், ஃபைசர் - பயோஎன்டெக் தடுப்பூசி செலுத்தப்பட்டவர்களுக்கு ரத்த உறைவு போன்ற எந்த பாதிப்பும் இல்லை எனவும் தெரிவிக்கப்பட்டிருக்கிறது.
ஆக்ஸ்போர்டு-அஸ்ட்ராஜெனகா மற்றும் ஃபைசர்-பயோஎன்டெக் தடுப்பூசிகள் இரண்டையும் பயன்படுத்தி இங்கிலாந்தில் இதுவரை 31 மில்லியனுக்கும் அதிகமான முதல் தவணை தடுப்பூசி செலுத்தப்பட்டிருக்கிறது.