அனிதா தற்கொலை: மாதர் சங்கம் ஏன் போராடவில்லை என டி.ராஜேந்தர் கேள்வி

அனிதா தற்கொலை பிரச்னையில் மாதர்சங்கம் ஏன் போராட்டம் நடத்தவில்லை என டி.ராஜேந்தர் கேள்வி எழுப்பியுள்ளார்.

சென்னையில் பத்திரிகையாளர்களை சந்தித்த அவர், “பீப் பாடலுக்காக என் வீட்டு வாசல் வரை வந்து முற்றுகையிட்டுப் போராடிய மாதர் சங்கத்தினர் அனிதா தற்கொலைக்காக  போராடவில்லை ஏன்? என் மகனுக்கு எதிராக பீப் சாங் போராட்டம் அவ்வளவு நடந்தது. அந்த பீப் சாங்குக்காக போராடின மகளிர் அணியினர் எல்லாம் அனிதாவுக்காக போராடவில்லையே? எங்கே போனார்கள் அவர்கள் எல்லாம்? பீப் சாங் போராட்டம் சிம்புக்கு எதிராக தூண்டிவிடப் பட்ட சூழ்ச்சி வலை. இதுதான் உண்மை நிலை. வழக்குப் போட்ட காஞ்சிபுரம் உட்பட பல ஊர் நீதி மன்றங்களுக்குப் போய் போரடி தான் நான் ஜெயித்திருக்கிறேன். புகார் கொடுக்கப்பட்ட காவல் நிலையங்களுக்கு ஏறிபோய் இன்று வரை போராடிக் கொண்டிருக்கிறேன்.” என்று தன் ஆதங்கத்தை வெளிப்படுத்தினார். அதோடு “அனிதாவின் ஆன்மாவும் ஜெயலலிதாவின் ஆன்மாவும் எட்டப்பாடி பழனிசாமி அரசை மன்னிக்காது”என்றும் எச்சரித்தார்.
 
சில மாதங்களுக்கு முன்பு டி.ராஜேந்தர் மகன் சிம்பு ‘பீப்’ பாடல் என்ற புதிய வடிவில் ஒரு பாடலை வலைதளத்தில் வெளியிட்டு இருந்தார். அதில் பெண்களை தரக்குறைவாக குறிப்பிடும் வார்த்தைகள் இடம்பெற்றுள்ளதாக கூறி மாதர் சங்கங்கள் போராட்டம் நடத்தின. நீதிமன்றம் வரை சென்று வழக்கு நடத்தினர். சிம்பு பொது மன்னிப்பு கேட்டால் மட்டுமே போராட்டம் வாபஸ் வாங்கப்படும் என்றும் அவர்கள் எச்சரித்திருந்தனர். ஆனால் இந்தப் பிரச்சினையை நீதிமன்றம் மூலமே தீர்த்து கொள்ள விரும்புகிறோம். மன்னிப்பு கேட்க முடியாது என்று சிம்பு தரப்பில் கூறப்பட்டிருந்தது.