தமிழகத்தில் நாளை நடைபெறும் கடையடைப்பு போரட்டத்திற்கு திமுக செயல் தலைவர் ஸ்டாலின் ட்விட்டரில் வேண்டுகோள் விடுத்துள்ளார்.
தூத்துக்குடியில் ஸ்டெர்லைட் ஆலையை நிரந்தரமாக மூட வலியுறுத்தி எதிர்ப்பு தெரிவித்து கடந்த 22ஆம் தேதி போராட்டம் நடைப்பெற்றது. அப்போது ஆட்சியர் அலுவலகத்தை முற்றுகையிடும் போராட்டத்தில் போராட்டக்காரர்களுக்கு காவல்துறையினருடன் மோதல் ஏற்பட்டதன் காரணமாக கல் வீச்சு, கண்ணீர் புகை, குண்டு வீச்சு, தடியடி, துப்பாக்கிச் சூடு உள்ளிட்டவை நடத்தப்பட்டன. அதில் போராட்டக்காரர்கள் 12 பேர் உயிரிழந்தனர்.இச்சம்பவம் தமிழகத்தில் பெரும் பரபரப்பை ஏற்படுத்தியது.
இச்சம்பவத்தில் துப்பாக்கிச்சூடு நடத்தியதற்கு பலர் கண்டனம் தெரிவித்துள்ளனர். இந்நிலையில் இன்று தலைமைச் செயலகத்தில் முதலமைச்சர் அறை முன் அமர்ந்து போராட்டம் நடத்திய திமுக செயல் தலைவர் மு.க.ஸ்டாலினை போலீஸார் கைது செய்தனர். இதனையடுத்து மாலை மு.க.ஸ்டாலின் விடுவிக்கப்பட்டார்.இந்நிலையில் நாளை தமிழகத்தில் முழு அடைப்பு போரட்டத்திற்கு மு.க.ஸ்டாலின் அழைப்புவிடுத்த நிலையில் தனது அதிகாரப்பூர்வ ட்விட்டர் பக்கத்தில் தமிழக மக்களுக்கு வேண்டுகோள் விடுத்துள்ளார். அதில் “நாளை அறிவித்துள்ள முழு அடைப்பு போராட்டத்திற்கு தமிழக மக்கள் பேராதரவை அளிக்க வேண்டுகிறோம்” என்று பதிவிட்டுள்ளார்.