பாஜகவுக்கு செல்கிறாரா மு.க.அழகிரி? என்ன சொல்கிறது இருதரப்பும்?

மு.க.அழகிரி பாஜகவுக்கு வந்தால் வரவேற்போம் என பாஜக தமிழக தலைவர் முருகன் தெரிவித்துள்ளார்

திமுகவின் தென்மண்டல செயலாளராக இருந்த மு.க.அழகிரி 2014 ஆண்டு மார்ச் 25 ஆம் தேதி கட்சியிலிருந்து நீக்கப்பட்டார், அதன்பிறகு நேரடி அரசியலில் பங்கேற்காமல் இருந்தார் அழகிரி, அவ்வப்போது அரசியல் பிரவேசம் குறித்து பேசிவருகிறார். இதற்கிடையே தனிக்கட்சி தொடங்குவது தொடர்பாக வரும் 20 ஆம் தேதி மதுரையில் தனது ஆதரவாளர்களுடன் முக்கிய ஆலோசனை நடத்த உள்ளதாகவும் தகவல் வெளியானது.

கருணாநிதி பெயரில் இந்த அமைப்பு அல்லது கட்சி இருக்கலாம் என்ற தகவலும் வெளியாகியுள்ளது. இந்நிலையில் மு.க.அழகிரி பாஜகவில் இணையவுள்ளதாகவும் தகவல்கள் பரவி வருகின்றன. இது தொடர்பாக பாஜக தமிழக தலைவர் முருகனிடம் கேள்வி எழுப்பப்பட்டது. அதற்கு பதிலளித்த அவர், மு.க.அழகிரி பாஜகவுக்கு வந்தால் வரவேற்போம் என தெரிவித்தார்.

இது குறித்து புதிய தலைமுறைக்கு பேசிய அழகிரி, இதுவரை எந்த முடிவும் எடுக்கவில்லை. ஜனவரிக்கு பிறகு ஆதரவாளர்களுடன் ஆலோசித்து பின்னர் அடுத்தக்கட்ட நகர்வுகள் குறித்து அறிவிப்பேன் என தெரிவித்துள்ளார்.