வங்கதேச அணிக்கு எதிரான இரண்டாவது டெஸ்ட் போட்டியில் வெற்றிபெற 145 ரன்களே தேவை என்ற இடத்தில் மூன்றாவது நாள் முடிவில் 4 விக்கெட்டுகளை இழந்துள்ளது இந்திய அணி.
வங்கதேசத்திற்கு சுற்றுப்பயணம் மேற்கொண்டுள்ள இந்திய அணி, 3 போட்டிகள் கொண்ட ஒருநாள் தொடர் மற்றும் 2 போட்டிகள் கொண்ட டெஸ்ட் தொடரில் பங்கேற்று விளையாடிவருகிறது. ஒருநாள் தொடரில் 2-1 என்ற நிலையில் வங்கதேசத்திடம் படுதோல்வியடைந்த இந்திய அணி, 2 போட்டிகள் கொண்ட டெஸ்ட் தொடரில் முதல் டெஸ்ட் போட்டியில் 188 ரன்கள் வித்தியாசத்தில் வெற்றிபெற்று பதிலடி கொடுத்தது.
இந்நிலையில் டிசம்பர் 22 அன்று தொடங்கப்பட்ட 2ஆவது டெஸ்ட் போட்டியில் முதல் இன்னிங்ஸில் வங்கதேச அணி 227 ரன்கள் சேர்க்க, இந்திய அணி 10 விக்கெட்டுகள் இழப்பிற்கு 314 ரன்கள் சேர்த்தது. 87 ரன்கள் பின் தங்கிய நிலையில், இரண்டாவது இன்னிங்ஸை ஆடிய வங்கதேச அணி ஷகிர் ஹாசன் மற்றும் லிட்டன் தாஸ் உதவியால் 231 ரன்கள் சேர்த்தது.
145 ரன்கள் எடுத்தால் வெற்றி என்ற இலக்கோடு களமிறங்கிய இந்திய அணிக்கு, மூன்றாவது நாள் முடிவில் ஆட்டம் காமித்தனர், வங்கதேச அணி பந்துவீச்சாளர்கள். அபாரமாக பந்துவீசிய மெஹிதி ஹாசன் இந்திய அணியின் ஓபனர்களின் மேல் அழுத்தத்தை அதிகமாக்கினார். பேட்டுகளில் பட்டு எஜ்ஜானபோதிலும் கேஎல் ராகுல் முதலில் தப்பினார். பின்னர் 3ஆவது ஓவர் வீச வந்த ஷாகிப் அல் ஹசன் கேஎல் ராகுலை 2 ரன்களுக்கு வெளியேற்றினார். முதல் விக்கெட்டை இழந்த பிறகு இந்திய அணியை தன்னுடைய சிறப்பான பந்துவீச்சால் மிரட்டிய மெஹிதி ஹாசன், சட்டீஸ்வர் புஜாரா, சுப்மன் கில், விராட் கோலி என அடுத்தடுத்து விக்கெட்டுகளை கைப்பற்றி அசத்தினார். 37 ரன்களுக்கே 4 விக்கெட்டுகளை இழந்த இந்திய அணி, மெயின் பேட்டர்களை அடுத்து களமிறக்காமல் அக்சர் பட்டேல் மற்றும் உனாத்கட்டை களமிறக்கியது.
மெயின் பேட்டர்கள் சொதப்பினாலும் சிறப்பான டிபன்ஸ் ஆட்டமுறையை வெளிக்காட்டிய அக்சர் பட்டேல் 54 பந்துகளை சந்தித்து 3 பவுண்டரிகளுடன் 26 ரன்னிலும், உனாத்கட் 3 ரன்களிலும் களத்தில் உள்ளனர். 3ஆவது நாள் ஆட்டமுடிவில் 4 விக்கெட்டுகளை இழந்து 45 ரன்களை பெற்றுள்ளது இந்திய அணி.
உலக டெஸ்ட் சாம்பியன்சிப்பிற்கு முக்கியமான இந்த போட்டி!
உலக டெஸ்ட் சாம்பியன்சிப் இறுதிபோட்டிக்கு செல்ல முக்கிய போட்டியாக பார்க்கப்படுகிறது இந்தியா மற்றும் வங்கதேச அணிகளுக்கிடையேயான இந்த போட்டி. 9 போட்டிகளில் வெற்றி 1 போட்டியில் தோல்வி என பெற்று 127 புள்ளிகளுடன் முதலிடத்தில் இருக்கிறது ஆஸ்திரேலிய அணி, 4 போட்டிகளில் தோல்வியை சந்தித்து 7 போட்டிகளில் வென்றிருக்கும் இந்தியா 87 புள்ளிகளுடன் இரண்டாவது இடத்தில் இருக்கிறது. வலுவான போட்டியில் தென்னாப்பிரிக்கா மற்றும் இலங்கை அணிகள் அடுத்தடுத்த இடங்களில் இருக்கின்றனர்.
இந்நிலையில் அடுத்து இந்திய அணி 4 போட்டிகள் கொண்ட டெஸ்ட் தொடரில் ஆஸ்திரேலியாவை சந்திக்கவிருக்கிறது. இதனால் அனைத்து போட்டிகளிலும் வெல்லவேண்டிய கட்டாயத்தில் இருக்கிறது இந்திய அணி.
தொடர்ந்து சொதப்பி வரும் இந்திய அணியை கேள்வி எழுப்பும் ரசிகர்கள்!
சமீப காலங்களில் இந்திய அணியின் பந்துவீச்சு மற்றும் பேட்டிங் இரண்டும் கேள்விகளுக்கு ஆட்பட்ட ஒன்றாகவே இருந்து வருகிறது. அந்தளவு மோசமான ஆட்டத்தையே வெளிப்படுத்திவருகிறது இந்தியா. இந்நிலையில் இன்று எளிதாக வெல்ல வேண்டிய போட்டியை 37 க்கு 4 விக்கெட்டுகளை இழந்த நிலையில், நன்றாக விளையாடும் ஒரு வீரர்களை கூட பார்க்கமுடியவில்லை, இந்தியாவின் பயிற்சியாளர்கள் என்ன செய்கின்றனர், அவர்களை நீக்கவேண்டும் என இந்திய அணியின் ரசிகர்கள் தங்களது அதிருப்தியை சமூகவலைதளங்களில் வெளிப்படுத்திவருகின்றனர்.