பெரும் எதிர்பார்ப்புகளுக்கு மத்தியில், உலக டெஸ்ட் சாம்பியன்ஷிப் இறுதிப் போட்டி லண்டன் ஓவல் மைதானத்தில் இன்று மதியம் 3 மணிக்கு தொடங்கியுள்ளது. இந்தப் போட்டியில் பேட் கம்மின்ஸ் தலைமையிலான ஆஸ்திரேலிய அணியும், ரோகித் சர்மா தலைமையிலான சென்னை அணியும் பலப்பரீட்சை நடத்தி வருகின்றன. டாஸ் வென்ற இந்திய அணியின் கேப்டன் ரோகித் சர்மா பீல்டிங்கை தேர்வு செய்ததை அடுத்து, ஆஸ்திரேலிய அணி தற்போது பேட்டிங் செய்து வருகிறது.
இந்நிலையில், உலகின் நம்பர் ஒன் டெஸ்ட் பவுலரான அஸ்வின் பிளேயிங் லெவனில் சேர்க்கப்படாதது கடும் விமர்சனத்துக்கு உள்ளாகியுள்ளது. ஏனெனில், இந்திய ஆடும் அணியில் ஷமி, உமேஷ் யாதவ், சிராஜ், ஷர்துல் தாக்கூர் ஆகிய 4 வேகப்பந்து வீச்சாளர்களும், சுழற்பந்து தரப்பில் ரவீந்திர ஜடேஜா மட்டுமே சேர்க்கப்பட்டுள்ளனர். ஆடும் லெவனில் அஸ்வினுக்கு வாய்ப்பு அளிக்கப்படவில்லை.
இந்நிலையில் டாஸ் வென்றபோது கேப்டன் ரோகித் சர்மா கூறுகையில், “நாங்கள் முதலில் பந்துவீச உள்ளோம். வானம் மேகமூட்டமாக உள்ளது. ஆடுகளத்தின் தன்மை பெரிதாக மாறும் என்று நான் நினைக்கவில்லை. இந்தப் போட்டியில் நன்றாக விளையாடி ஜெயிக்க வேண்டும் என்று விரும்புகிறோம். 4 வேகப்பந்து வீச்சாளர்களையும், ஒரு ஸ்பின்னரையும் எடுத்துள்ளோம். அந்த சுழற்பந்து வீச்சாளர் ஜடேஜாதான்.
பல வருடங்களாக அணியின் மேட்ச் வின்னராக இருந்துவரும், அஸ்வினை எடுக்காதது கடினமான முடிவுதான். ஆனால் அணி வெற்றியடைவதற்கு தேவையான விஷயங்களை செய்ய வேண்டும் என்பதால், இறுதியில் நாங்கள் அந்த முடிவை எடுத்தோம். அதேபோல், ரஹானே நிறைய அனுபவங்களை பெற்றவர். அவர் 80-க்கும் மேற்பட்ட டெஸ்ட் போட்டிகளில் விளையாடியுள்ளார். மேலும் அணிக்காக அவர் சிறப்பாகச் செயல்பட்டுள்ளார். கொஞ்ச காலம் வெளியே இருந்தது, அவரின் அனுபத்தை மாற்றிவிடாது என்று நினைக்கிறேன்” என்று குறிப்பிட்டுள்ளார்.
இந்திய அணியின் கேப்டனாக இருந்தபோது, விராட் கோலி எப்போதுமே அஸ்வினை வெளியில் அமர வைப்பார் என்று விமர்சனங்கள் எழுந்த நிலையில், அதேபோல், இன்று ரோகித் சர்மா செய்துள்ளதாக நெட்டிசன்கள் கருத்து தெரிவித்து வருகின்றனர். முன்னதாக பல முன்னாள் கிரிக்கெட் வீரர்களும், அணியில் ரவிச்சந்திரன் அஸ்வின் எடுக்கப்படவே வாய்ப்பு உண்டு என்று தெரிவித்து வந்தநிலையில், தற்போது அவர் எடுக்கப்படவில்லை. கடந்த முறை நியூசிலாந்துக்கு எதிரான உலக டெஸ்ட் சாம்பியன்ஷிப் இறுதிப் போட்டியில் அஸ்வின் 2 இன்னிங்சிலும் சேர்த்து பேட்டிங்கில் 29 ரன்களும், பந்து வீச்சில் 4 விக்கெட்டுகளையும் எடுத்திருந்தார்.