ஆஸ்கார் விருதுக்கான நாமினிகளை அறிவிக்க உங்களுக்கு என்ன தகுதி உள்ளது என்ற பத்திரிகையாளரின் கேள்விக்கு நடிகை பிரியங்கா சோப்ரா பதில் அளித்துள்ளார்.
வரும் 25-ஆம் தேதி நடைபெற உள்ள ஆஸ்கர் விருது வழங்கும் விழாவை இந்தியாவை சேர்ந்த நடிகை பிரியங்கா சோப்ராவும், அவரது கணவர் நிக் ஜோனசும் தொகுத்து வழங்க உள்ளனர். இந்நிலையில் ஆஸ்திரேலியாவை சேர்ந்த பத்திரிகையாளரான பீட்டர் போர்ட் “ஆஸ்கார் விருதுக்கான நாமினிகளை அறிவிக்க நடிகை பிரியங்காவுக்கு என்ன தகுதி உள்ளது?” என ட்விட்டரில் கேள்வி எழுப்பி இருந்தார். அதற்கு தற்போது ரிப்ளை கொடுத்துள்ளார் பிரியங்கா.
“ஒருவருக்கு என்ன தகுதி இருக்கிறது என்பது குறித்த உங்கள் கேள்விக்கு பதில் அளிக்க விரும்புகிறேன். இதோ எனது பங்களிப்பில் வெளியான 60-க்கும் மேற்பட்ட திரைப்படங்களை உங்கள் பார்வைக்கு அதற்கு சான்றாக வைத்துள்ளேன்” என ட்வீட் செய்துள்ளார்.
ஆஸ்திரேலியா மற்றும் நியூசிலாந்து நாட்டின் எண்டர்டெயின்மெண்ட் பத்திரிகையாளர் என தன்னை ட்விட்டரில் அறிமுகம் செய்து கொண்டுள்ளார் பீட்டர் போர்ட்.
அவரது ட்வீட்டுக்கு ரசிகர்கள் பலர் பிரியங்கா நடிப்பில் உருவான படத்தை பார்க்குமாறு பரிந்துரைத்துள்ளனர். முதன்முதலில் தமிழ் படமான தமிழனில் நடித்து, அதன் மூலம் வெள்ளித்திரைக்குள் என்ட்ரியானவர் பிரியங்கா சோப்ரா.