நடிகர் விஷ்ணு விஷால் ஸ்டூடியோஸ் தயாரிப்பில், ரெட் ஜெயன்ட் மூவிஸ் உதயநிதி ஸ்டாலின் வழங்கும் திரைப்படம் “எஃப் ஐ ஆர் (FIR)”. இப்படத்தை இயக்குநர் மனு ஆனந்த் இயக்கியுள்ளார். பரபரப்பான கமர்ஷியல் திரில்லர் படமாக உருவாகியுள்ள இப்படம், வரும் 2022 பிப்ரவரி 11 உலகம் முழுவதும் வெளியாக உள்ளது.
இந்தப் படத்தில் விஷ்ணு விஷாலுடன் மஞ்சிமா மோகன், ரைசா வில்சன், ரெபா மோனிகா ஜான் என 3 நாயகிகள் நடித்துள்ளனர். இயக்குநர் கௌதம் மேனன் மிக முக்கிய கதாபாத்திரத்தில் நடித்துள்ளார். ரசிகர்களிடம் எதிர்பார்ப்பை ஏற்படுத்தியுள்ள இப்படத்தின் வெளியீட்டை ஒட்டி, படக்குழுவினர் இப்படத்தின் ட்ரைலரை வெளியிட்டு பத்திரிக்கையாளர்களை சந்தித்தனர்.
அப்போது நடிகரும் தயாரிப்பாளருமான விஷ்ணு விஷால் பேசுகையில், “எனக்கு மிகவும் எமோஷனலான தருணம் இது. இந்த மேடை மிக முக்கியமான மேடை. என் அப்பா இல்லை என்றால் நான் இங்கு இருந்திருக்க மாட்டேன். அவர் எனக்காக நிறைய உழைத்திருக்கிறார். நான் அவரது இடத்தில் இருந்தால் இது போல் செய்திருப்பேனா என்பது தெரியாது, அவருக்கு நன்றி. இப்படத்தின் இயக்குநர் மனுவை சந்தித்தபோது நான் நிறைய படம் பண்ணிட்டேன் ஆனால் இன்னும் புதிதாக ஒரு நடிகராக நல்ல படம் செய்ய வேண்டும் என தோன்றியது. ராட்சசன் படம் இந்திய அளவில் ஒரு நடிகராக ஒரு மரியாதை பெற்று தந்தது. இந்தக் கதை சொன்னபோதே எனக்கு பிடித்திருந்தது.
இந்தப் படத்தில் வரும் விஷயங்கள், நிஜத்திலும் நடைமுறையிலும் இருப்பதுதான். நான் வளர்ந்த விதம் வேறு என்பதை இந்தக் கதையை கேட்ட போதுதான் நான் உணர்ந்தேன். `அட இது உண்மையில் நடக்கிறதே, இதை நிச்சயம் திரையில் சொல்ல வேண்டும்’ என தோன்றியது.
படத்தின் தயாரிப்பாளர் எனும் முறையில், ஒரு கட்டத்தில் இந்தப் படத்தை தயாரிக்க முடியாத சூழ்நிலை உருவானது. அப்போது என்னிடம் வந்து `நீங்கள் காத்திருக்க வேண்டும்’ என உண்மையை சொன்னார் இயக்குநர் மனு. அவரது நேர்மை எனக்கு பிடித்திருந்தது. அதனால் அவருக்காகத் தான் இந்தப்படம் செய்தேன். இன்று 4 படங்கள் செய்கிறேன், எனக்கு நம்பிக்கை தந்த மனுவுக்கு நன்றி. அவர் கூட்டி வந்தவர் தான் ஷ்ரவந்தி. பேசும்போதே பாஸிட்டிவாக இருந்தார். அவர் என் தங்கையின் இடத்தை பிடித்திருக்கிறார். மனு எப்போதும் என்னை பெரிதாக யோசிக்க சொல்வார். என்னை பெரிதாக மாற்றியிருக்கிறார்.
இந்தப் படத்தை ப்ரெஸ் ஷோ வழியாக நிறைய பேர் பார்த்துவிட்டார்கள். நடிகர் தனுஷ் படம் பார்த்து விட்டு, ` ராட்சசன் படத்தை தாண்டி இந்தப்படத்தில் ஒரு நடிகராக மிரட்டி விட்டீர்கள்’ என்று பாராட்டினார், ரொம்ப சந்தோஷமாக இருந்தது. அதற்காக அவருக்கு நன்றி. கொரோனா பொதுமுடக்கம், நிறைய பெர்சனல் ஸ்பேஸ் தந்தது. அதை நல்ல முறையில் பயன்படுத்தி, எல்லோரும் உழைத்து அழகாக இந்தப்படத்தை உருவாக்கியுள்ளோம். உதய் அண்ணா, செண்பகமூர்த்தி சாருக்கு என் வாழ்நாள் முழுதும் நன்றி சொன்னாலும் பத்தாது. அந்தவகையில் உதய் அண்ணாதான் என்னுடைய மிகப்பெரிய சப்போர்ட்.
இப்போது இந்தப் படத்திற்காக என்று சொல்லவில்லை. குள்ளநரி கூட்டம் படத்தையே அவர்கள் தான் ரிலீஸ் செய்து தந்தார்கள். எனக்கு எப்போதும் உறுதுணையாக இருந்துள்ளார்கள், இந்தப் படத்தை ரிலீஸ் செய்வதற்கு நன்றி. ரெட் ஜெயன்ட் மூவிஸ் விநியோக நிர்வாகி ராஜா அவர்களுக்கு நன்றி. தங்கதுரை சாருக்கு நன்றி, என்றும் எனக்கு உறுதுணையாக இருப்பவர். எப்போதும் போல் இந்தப்படத்திற்கும் ஆதரவு தாருங்கள்” என்றார்.
சமீபத்திய செய்தி: கச்சத்தீவு திருவிழாவிற்கு தமிழக பக்தர்களை அனுமதிக்க வேண்டும் - மீனவ சங்கத்தினர் கோரிக்கை