கிக் படத்திற்காக முதன்முறையாக சொந்தக் குரலில் பாடினார் நடிகர் சந்தானம்.
பிரபல கன்னட இயக்குனர் பிரசாந்த் ராஜ் இயக்கத்தில் சந்தானம் நடிக்கும் படம் கிக். இவருடன் தன்யா ஹோப், ராகினி திவேதி மற்றும் பலர் இப்படத்தில் நடிக்கிறார்கள். இப்படத்திற்கு அர்ஜுன் ஜன்யா இசையமைக்கிறார். இப்படத்தின் முதல் பாடலுக்கான விளம்பர வீடியோ இன்று வெளியாகியுள்ளது. அதில் "சாட்டர்டே இஸ் கம்மிங்கு..." (Saturday is cominguu) என்று ஆரம்பிக்கும் பாடலை முதல் முறையாக நடிகர் சந்தானம் சொந்தக் குரலில் பாடியிருக்கிறார். இப்பாடலை கவிஞர் விவேகா எழுதியிருக்கிறார். இப்பாடலின் முழு வரிகளுக்கான வீடியோ அக்டோபர் 10ஆம் தேதி மாலை 06.03 மணிக்கு வெளியாகவுள்ளது.
கிக் திரைப்படம், நகைச்சுவையான பொழுது போக்கு படமென சொல்லப்படுகிறது. பல ஹிட் படங்களை கன்னடத்தில் கொடுத்து, இப்படம் மூலம் தமிழுக்கும் வந்திருக்கிறார் பிரசாந்த் ராஜ். விளம்பர நிறுவனத்தில் பணிபுரிகிற சந்தானம் குறுக்கு வழியில் கூட போய் வெற்றியை அடைய துடிக்கிறவர் என்பதே படத்தின் ஒன்லைன் என்று சொல்லப்படுகிறது.
'தாராள பிரபு' ஹீரோயின் தான்யா ஹோப், நேர்மையாய் விளம்பரத் துறையில் முன்னேற துடிக்கிற கேரக்டரில் நடித்திருக்கிறாராம். இப்படியாக இரண்டு பேரும் எலியும் பூனையுமாக மோதி கொள்வது தான் கதை என்றும், சந்தானத்தை விரும்பி பார்ப்பவர்களுக்கான படம் இது என்றும் இயக்குநர் தெரிவித்திருக்கிறார். எமோஷன், சென்டிமென்ட், டிராமா எல்லாம் கலந்து இருக்கிற ஜனரஞ்சகமான இப்படத்தில், தம்பி ராமையா, பிரமானந்தம், செந்தில், கோவை சரளா, மன்சூர் அலிகான், மனோபாலா, ஒய்.ஜி.மகேந்திரா, மொட்டை ராஜேந்திரன், ஷகிலா, ராகிணி திவேதி, வையாபுரி, சிசர் மனோகர், கிங்காங், முத்துக்காளை, சேஷு, கூல் சுரேஷ், அந்தோணி என பலர் இப்படத்தில் உள்ளனர்.
கன்னடத்தை சேர்ந்த அர்ஜுன் ஜன்யா இப்படத்திற்கு இசையமைத்துள்ளார்.